Kaos me kalendarin e Superiores, katër skuadra do të kenë si shtëpi stadiumin e Partizanit
“Caushlia.com” zbulon se stadiumi “Niko Dovana” i Durrësit dhe impianti “Egnatia Arena” i Rrogozhinës në ditët e ardhshme do t’i nënshtrohen procesit të mbjelljes së barit për rigjenerimin e fushës dhe për një periudhë të konsiderueshme do të jenë të mbyllura.
Si pasojë e kësaj, ndeshja Erzeni-Partizani, e planifikuar të luhet më 23 tetor, nuk do të luhet në Rrogozhinë, ku shijakasit zhvillojnë ndeshjet si pritëse, por në stadiumin e “demave”.
Të zënë ngushtë nga mbyllja e impianteve, drejtuesit shijakas kanë rënë dakord që ndeshjen si pritës ndaj të kuqve, ta luajnë në shtëpinë e këtyre të fundit.
Gjithashtu, ndeshja Teuta-Partizani, e planifikuar në “Niko Dovana” më 28 tetor, do të luhet po në “Arenën e Demave”. Por këtë herë ndryshe nga ndeshja me Erzenin, është rënë dakord këmbimi i fushës.
Kështu, ndeshja e prapambetur e javës së parë mes dy ekipeve do të luhet në Durrës dhe jo në Tiranë, në një datë që do të caktohet në ditët në vijim.
Po në “Arenën e Demave” Egnatia ka prenotuar ndeshjen si pritëse ndaj Kukësit, për javën e 11-të. Në të njëjtin stadium do të luhet edhe ndeshja e javës së 12-të mes Erzenit dhe Egnatias, me shijakasit si pritës.
