Kodi i ri Penal sjell ndryshime të forta për krimet seksuale
Drafti i Kodit të ri Penal ka qarkulluar që prej verës së vitit 2025 dhe pritet të miratohet së shpejti në Parlament. Ndryshimet e propozuara fokusohen në ashpërsimin e dënimeve për krimet seksuale, duke zgjeruar përgjegjësinë penale edhe për veprime të kryera jashtë territorit të Shqipërisë.
Një nga pikat më të debatuara lidhet me ndëshkimin e organizimit të udhëtimeve për qëllime seksuale.
Kriminalizime të reja në Kodin e ri Penal
Sipas draftit, për herë të parë parashikohet:
-
kriminalizimi i përfshirjes së fëmijëve si dëshmitarë të abuzimit seksual
-
ashpërsimi i dënimeve për shfrytëzimin e prostitucionit me të mitur
-
ndëshkimi penal për organizimin e udhëtimeve për qëllime seksuale
Këto ndryshime synojnë të mbyllin boshllëqet ligjore ekzistuese.
Neni 108/b: Burg për seks gjatë udhëtimeve jashtë Shqipërisë
Në nenin 108/b të Kodit të ri Penal parashikohet se organizimi i udhëtimeve për të tjerë, me ose pa shpërblim, për qëllime seksuale, dënohet me burg nga dy deri në gjashtë vjet.
Ligji thekson se dënimi zbatohet edhe në rastet kur marrëdhënia seksuale kryhet jashtë Shqipërisë, pavarësisht ligjeve të vendit ku ndodh udhëtimi.
Kjo do të thotë se edhe në mungesë përfitimi financiar, organizatori i udhëtimit mban përgjegjësi penale nëse plotësohen kushtet e parashikuara në Kodin Penal.
Dënime edhe për kompanitë dhe bizneset
Drafti parashikon masa të rënda edhe për personat juridikë. Nëse një kompani, agjenci ose subjekt tjetër juridik përfshihet në organizimin e udhëtimeve për qëllime seksuale, përveç dënimit penal, gjykata mund të vendosë edhe mbylljen e përhershme të biznesit.
Paqartësi mbi provat dhe zbatimin e ligjit
Në draft nuk sqarohet se si do të provohet kryerja e marrëdhënieve seksuale jashtë Shqipërisë. Kjo çështje mbetet e hapur dhe pritet të jetë objekt diskutimi gjatë zbatimit praktik të ligjit.
